Nigagawa mo ba ito noon?

Ang sarap maging bata. Hindi dahil sa lagi kang binebeybi ng nanay mo at lagi kang may pasalubong sa tatay mo kundi dahil mas natutuwa sila sayo kung mahilig kang matulog, magana kang kumain at marami kang tanong. Sa pagtanda mo at mahilig ka pa rin matulog, ikaw ay tatawaging tamad. Pag malakas kang kumain tatawaging kang matakaw. Pag marami kang tanong, bobo at reklamador.

Noon, bilib na bilib ka sa mga magikero at piling mo ay alagad sila ng diyos.

Noon, ginagawa mong eroplano o sumbrero ang bill ng meralco. Ngayon, pwede ka ng sumakay ng eroplano sa isang taong bill mo sa meralco.

Noon, pwede kang bumili ng toyo sa kanto ng nakasando lang at walang salawal. Ngayon, pag ginawa mo yun, pagkakamalan ka ng may toyo sa ulo.

Noon, masaya ka na pag binigyan ka ng 5 piso ng lola mong kulubot ang mukha. Ngayon, mangungulubot ang mukha mo pag binigyan ka ng 5 piso.

Noon, pinampapalo mo sa ulo ang bote ng 1.5 na coke na walang laman sa kaklase mong makulit. Ngayon, ikaw na ang dapat na pinapalo ng 1.5 na bote ng coke sa ulo mo sa baba dahil pasaway na ang matigas na ulo mong maliit.

Noon, gustong gusto mong tumutulong sa pagluluto sa kusina. Ngayon, kahit magsaing kinatatamaran mo na.

Noon, tuwang-tuwa ka sa pagkanta sa harap ng electric fan at ang tawag mo pa nga doon ay eric fan. Tuwang-tuwa ka sa boses mong nanginginig. Sinasayad mo pa nga ang nguso mo sa mismong bakal ng eric fan. Ngayon, alam mo na kung bakit parang maalat-alat at maalikabok ang bibig mo at parang nakakain ka ng sariwang pusit.

Noon, pag tinatanggal ang T-shirt mong masikip pinapag-superman ka nila o darna para madali nilang matanggal ang damit mo. Ngayon, solo ka na sa pagtratransform.

Noon, pinagpipyestahan ka na ng buong angkan niyo pag natuto ka ng magbilang 1 to 10, alam mo na ang english ng manok, alam mo na ang address sa bahay, alam mo na ang gagawin pag nawala ka sa SM at higit sa lahat pag alam mo ng mag-pabless sa mga matatanda.

Noon, sa tuwing may dumadaan na eroplano ay nagbabye ka at agad na tumitingin sa TV kung lumabo ba ang reception. Pag may dumaan na Jet mapapatitig ka sa puting pahabang usok nito at susundan ang jet at pag di mo na masundan sasabihin mong ‘wala na…’.

Noon, mahilig kang mamitas ng aratiris at ilalagay mo ito sa tabo at kakainin habang nanood kayo ng paborito niyong animation sa hapon. Mahilig ka na ring mamitas ng gumamela at didikdikin mo ito at ihahalo sa tubig para makagawa ka ng hinihipan na bula.

Noon, mahilig ka sa bunutan ng laruan at higit sa lahat bunutan ng maliit na bibe o sisiw. Kinakabahan ka na pag binabasa na ang papel. Pag nanalo ka naman ay dinaig mo pang ang nanalo sa lotto sa saya. Aalagaan mo ang bibe ng 3 araw at sa pang-apat na araw, makakalimutan mo ng may bibe ka nga palang alaga dahil kinain na ito ng daga.

Noon, mahilig kang bumili ng tattoo na tig pipiso at ilalagay mo ito sa iyong braso. Nagpapatulong ka lagi sa matanda dahil nalilito ka kung saang parte ba ang babasain ng tubig. Yung sa harap ba o sa likod? Pag gusto mo namang magkatattoo at the same time ay makakain, bibili ka ng Oishi na chichirya na tig pipiso at lalagyan mo ng alcohol ang balat pagkaubos nito tsaka ididikit sa iyong balat. Presto, nakachibog ka na may tattoo ka pa.

Noon, pag narinig mo na ang kalansing ng dirty ice cream, tatakbo ka na agad sa mama mo at magpapacute at manghihingi ng barya. Kasabay ng pag-abot ng barya ay pag-abot ng plastic na baso na lalagyan mo dahil sobrang kalat mo kumain ng ice cream at naniwala ka sa sabi-sabi na pinangkukulangot ng surbetero ang dulo ng mga apa. Ngayon, pinapalaman mo na ang ice cream sa tinapay.

Noon, mahilig kang makitikim ng pagkain. ‘Ano yan? Patikim. mmmsarap. San mo nabili? Magkano? (titingin sa bulsa sabay sambit) Ayyy mahal.’

Noon, mahilig kang manghuli ng tutubi at tatalian ito ng sinulid at gagawin mong eroplano. Ngayon, wala ka ng makitang tutubi masyado dahil sa milyong bata na kagaya mo.

Noon, mahilig ka sa Texas, Juicy Fruit, Bazooka at Judge dahil nakakapagpasikat ka sa mga kalaro mo dahil kaya mong magpalobo ng mas malaki pa sa mukha mo. Pag katapos mong magpalobo ay iluluwa mo ang gum at kukuha ka ng gaas at ihahalo doon at gagawa ka ng sapot na panghuli sa mga antik.

Noon, antik at langgam ang mortal na kaaway ng mga bata. Dahil sa sakit nilang mangagat nakaisip ng maraming paraan ang mga bata para makaganti.

>>>>Tatapakan ng mabilis

>>>>Lulunurin sa tubig

>>>>Papatakan ng kandila

>>>>Mangongolekta ng straw ng softdrinks at tutunawin at ipapatak

>>>>Papaluin ng nakarolyong dyaryo hangga’t di na uubos

>>>>Pipisilin ng daliri isa-isa

>>>>Duduraan

>>>>Sabay sabay na iihian

Noon, dahan-dahan mong sinasara ang pinto ng ref at titingnan kung namamatay nga talaga ang ilaw.

Noon, pinipindot mo lahat ang remote ng bago niyong appliances at di titigil hangga’t di nasusubukan lahat.

Noon, mahilig kayong magkwentuhan ng nakakatakot pag hapon na. Kapre, duwende, tikbalang, tiktik, manananggal, mangkukulam, ligaw na espiritu, white lady, black lady at aswang na nagiging aso at itim na pusa. Magkwekwentuhan tapos magtatakbuhan.

Noon, kahit tirik ang araw nagbabike ka at naglalaro ng sungkit baboy sa buhanginan malapit sa ginagawang bahay malapit sa inyo. Laging kang may beke, sumasakit ang tiyan dahil sa appendix, sinisinok, binabalisawsaw at nagtatae sa brief na may buo-buo pang mani.

Noon, mahilig ka rin manghuli ng kurukutok, singsing pari, surot, butete, gagambang ekis, gagambang botsog, salagubang, salaguinto at kataba. Ilalagay nyo sa garapon at lulunurin sa ihi, tubig at sabon o kaya ay aalugin hanggang sa mamatay o lalagyan ng watusi sa loob o bubuhusan ng softdrinks o hihingahan niyo pagkagising sa nyo kinabukasan ng umaga ng walang mumog-mumog.

Noon, mahilig kang magdoorbell sabay takbo. Isa ka rin sa pinakamalakas na sumisigaw ng ‘tenkyu tenkyu ambabarat ninyo tenkyu!!! (fast tempo)’.

Noon, mahilig kang mangtawag ng pogi tapos sasabihin mo ‘Ay aso..’ Gwapo-gwapo ‘Ay kabayo..’ Pssst-psssst ‘Ay pusit ka ba?’

Noon, mahilig ka sa bioman, power ranger, shaider, mask rider black, maskman, jiban, five man, ultraman at iba pa. Oo ikaw na si paborito mong red ranger. Tatambling ka at gagayahin ang mga unique nilang pose. Magpapabili ka ng look-a-like na espada nila at pagprapraktisan mo ang tito mo na mukhang halimaw.

Noon, bumibili ka ng sago’t gulaman at ginagawa mong sumpit ang straw at binabala ang sago. Minsan bolpen naman at balat ng orange.

Noon, mahilig ka sa langit lupa impyerno im im impyerno saksak puso tulo ang dugo… Gusto mo maging patotot sa patintero.. Lagi kang may sugat pag nag-aagawan base.. Naninilip sa tagu-taguan.. Di ka tumitigil hangga’t di napipili ang gusto mong piliin pag nagmiminiminimaynimo.. miniminimaynimo katchakatchakatchimo sino ba sa aming tatlo, ako ba o ito?i-to, totoo ba ito? o-o, di na ba mababago? o-o, sabi ba ng diyos? o-o. Di ka rin nagpapatalo nung bata ka..

Ikaw: Panget!

Siya: Mas panget ka!

Ikaw: Mas panget panget panget panget ka!

Siya:  Mas panget panget panget panget panget panget panget ka!

Ikaw: Ikaw ang pinaka panget sa mundo!

Siya: Ikaw ang pinakapangit sa buong galaxy!

Ikaw: Ikaw naman ang pinakapangit sa buong universe!

Siya: Ikaw naman pinakapangit sa… sa…

Ikaw: Ah wala ng masabi! Waaaaahhhh… panget panget!

Siya: Ok, lang identical twin naman tayo e!

Ikaw: Mas pangit ka pa rin!

—————–

—————–

—————–

Sa lahat ng sakit ng ulo na binigay natin.. Sa lahat ng gulo na pinasok natin.. Sa lahat ng sugat na ipinagamot natin.. May Pamilya tayong walang tigil at sawa na nagalaga at nagmahal sa atin.. Kung pwede ka nga lang ibenta binenta ka na nila dahil sa sobra mong kakulitan.

Pero di nila ginawa yun.

Sa likod kasi ng lahat, binubulong nila sa sarili nila..

‘loko talaga tong batang to..

manang-mana sa akin’.

-Metaporista

2011

Tahimik. Alas-4 ng umaga sa mundo. Tulala.

7 araw ko ginawa ang mundo. Minsan natatawa ako sa sarili ko dahil iniisip ko ulit kung ano bang pumasok sa isip ko’t pinag-aksayahan ko pa itong gawin. Ang pagkakaalala ko, nainip lang ako bigla dahil paulit-ulit na lang ang nangyayari sa buhay ko araw-araw. Laging masaya, laging walang problema. Boring.

Nag-isip tuloy ako ng isang magandang mapaglilibangan. Gagawa ako ng mundo. Lalagyan ko ng hayop. Lalagyan ko ng tao. Lalagyan ko ng puno at halaman. Lalagyan ko ng tubig. Pero boring pa rin kung ganun lang. Kaya para medyo exciting kokopyahin ko yung anyo ng tao sa anyo ko pero di ko sila gagawing saktong kagaya ko baka mamaya lumaki ulo nila. Gusto ko yung pwede ko silang gawing abo kahit anong oras ko gustuhin at pwede rin silang magpatayan. Yung isa ko ngang anghel tumalikod sa akin e. Pero hinayaan ko lang kasi medyo boring talaga e. Anytime naman kaya ko siyang gawing lamok at patapakan sa mga alaga ko. May naisip akong paggagamitan ko sa kanya. hehe.

 

Nakakatawa rin ang mga tao ngayon lalo na banda diyan sa pilipinas. Nung panahong umabot sa 700million ang premyo sa lotto, umangat ng 720% ang popularity ko. Napagpasyahan ko ng ibigay na sa isang tao ang premyo dahil na rin sa mga mga batang walang makain dahil pinantataya lahat ng magulang nila ang kanilang kinikita dahil sa pagnanais na tumama ng jackpot. Ayun, pagkabigay ko, balik sa dati ang popularity ko. Mas bumagsak ang popularity ko ngayon malapit na matapos ang taon dahil halos lahat ay nakatanggap na ng bonus except lang sa ibang  mga teacher sa public school. Pina-delay ko ng unti dahil baka pati sila malimutan na rin ako. Hindi rin naman ako sumisikat pag nagsimula na ang simbang gabi. E halos tulog nga kalahati ng mga tao sa bawat simbahan. Yung iba naglalakbay pa isip. At karamihan banal na aso pero santong kabayo.

Sa 2011 plano ko magpasabog ng 16 na bulkan, 380 na malakas na lindol, Babawasan ko ang crop production ng mga 20%, Babawasan ko pa lalo yung langis ng mga 45%, papatay ako ng 200 na sikat na personalid, pasisiklabin ko na rin ang away ng Nokor at Sokor, papabilisan ko pa yung pag-produce ng nuclear, padadamihin ko pa ang miyembro ng mga terorista, papataasin ko pa ang transfer rate ng AIDS ng 33.4% at gagawa na naman ako ng bagong virus na ikakalat. Magpapapatay din ulit ako ng maraming media at turista. Tutuyuin ko ulit ang tubig sa mga dam at mag-aalaga ulit ako ng maraming lamok at babawasan ko ang pag-produce ng palaka at butiki. Bibigyan ko pa ng mas matitinik na abilidad ang mga iilang mandarayang chinese para manggaya at mangopya ng produkto. Gagawin kong mas maabilidad ang mga magnanakaw, carnapper, holdaper at rapist para makapangbiktima ng mas maraming tao. 3 milyong pamilya ang wawasakin ko. 6 na milyong estudyante ang papatigilin ko sa pagaaral. Gagawin kong mas malalakas ang loob, swerte at mas matatapang ang mga corrupt na opisyal ng gobyerno. Padadanasin ko ng hirap ang 7 billiong tao.

Lahat yan gagawin ko. Pangako.

Ngayon kasing 2010, andami pa ring matatag na totoong naging lingkod ko at naging tapat sa akin sa kahit anong hirap at pagsubok ang binigay ko sa kanila. Gusto ko na unti-unting masala kung sino ba talaga ang mga tunay kong alagad. Mas mahirap ang ibibigay kong pagsubok ngayong 2011 at mas mahirap sa 2012. Gusto ko ng tapusin ang pagsubok sa mga tao ng 2012 kaso mukhang may humihingi pa ng extension. Baka 2014 na lang siguro para may makahabol pa pero secret lang natin yun. Dadakot lang ako ng buhangin sa tabing dagat. Ganun lang karami ang napagpasyahan kong bibigyan ng special na regalo. At yun lang yung mga naging tapat. Naging matatag. Natutong humingi ng tawad at mag-balik loob. At syempre, yung mga sumunod sa mga tunay kong aral at hindi ng aral ng anghel na binaon ko sa creek ng kadiliman.

Hindi ko gagawin ang lahat ng pagpapahirap dahil galit ako sa inyo. Sinusubok ko lang kayo. Peace tayo. Ganyan ko ginawa ang mundo. Parang survivor lang. At kung isa kang Akihiro Sato, ililigtas kita. Wag kang manisi ng iba sa mga paghihirap na nadadanasan mo ngayon. Ako ang may gawa niyan. Wag ka mag-alala. Wala akong binibigay na pagsubok na hindi mo kayang lampasan. Ang usapan lang diyan ay kung lalampasan mo ba yan sa mahirap na mabuting paraan o sa madaling masamang paraan.

Ngayon pa lang binabati ko na kayong lahat at kasali pa kayo sa palaro ko. Hanggang sa susunod na taon.